رساله إلى من يهمه الأمر . الشاعر طه الإسناوى .. من ديوان .. أنا والنساء -- تحياتى جدو عبدو
...... رساله إلى من يهمه الأمر .......
معلش ياباشا أنا غلطان
أنا كنت فاكر إن كلامك فاضى مش مليان
معلش يابيه أعزرنى
إوعى فيوم تزعل منى بص لحالى أنا غلبان
وكل الناس بتقولى جبان
أصل الناس مش عارفه
إن كلامك كل كلامك فى المليان
معلش ياباشا أنا غلطان
أنا عايزك تعرف وكمان تتأكد إنى بحبك زى زمان
ومهما يقولوا إنك كداب أو نصاب
مش ممكن أصدق إن حياتنا بقت هباب
ولا يمكن أبدا أقدر أقول إن حياتنا رماد وضباب
والله ماتزعل ولا تتعكر
ولاحاجه يابيه تساوى إن نشوفك يوم متوتر
معلش ياباشا أنا غلطان
بصراحه ياباشا الشغل مفيش
والجو سخيف والناس متاعيس
والفقر يابيه مش عايز يمشى ولا يتحرك من غرفتنا
قلت ياواحد قلت ياناس تعالوا غيتونا ياأهل حارتنا
تعالوا قلولى الفقر متبت جوا بيوتنا هنعمل ايه
نمسك فيه ولا نسيبوا ولا نروح لجناب البيه
معلش ياباشا أنا غلطان
إسمحلى أقولك إنى جبان وكمان عيان
وكمان صايم ليا تلات تيام
سألت وقلت ياشيخ يا إمام ممكن أصوم وأنا عيان
قالى حلال وأوعى تفكر إنى جبان
أنا مفتى ودارس كل الأديان
وكمان عارف إن الصوم للمضطر يبقى حلال وحلال وحلال
معلش ياباشا أنا غلطان
لكن أنا عندى سؤال
لو مش فاضى ده سؤال عادى أنا مبسوط وكله تمام
بصراحه أنا شايف على وشك علامات إستفهام
ممكن تجاوبنى بصراحه بكل صراحه
إنت ركبت الأوتوبيس ولا وقفت فى طوابير العيش
ياريت تقولى يابيه هل عربيتك مرسيدس ولا كوبيه
وإنت بتاكل كده زيينا ولا بتاكل بالأبونية
معلش ياباشا أنا غلطان
أنا عايزك تعرف ولا شىء فى الدنيا بيألمنى إلا الناس
الناس بتكذب وكلامها بيصدمنى
وأنا والله ياباشا مقلتش حاجه من اللى قالوه عنى
أنا رحت المركز فعلا أخدونى تحرى
ولا فيهم واحد بهدلنى
ولا حد شتمنى بأمى
ولا إيد إترفعت ولا وصلت فمى
ولا عالفلكه حد عزمنى
أنا فعلا قلت يارب إرحمنى
لكن مش منيهم
د من الدكتور اللى كان بيعالج عمى
لما كتبلوا رشته ضد الحاله
كل علاجها يقول إن حياة عمى تبقى محاله
على فكره يابيه مش هتصدق لما أقولك الدكتور خريج إيه
الدكتور متخرج من جامعه عريقه
ومكتوب على بابها يافطه عريضة
جامعه قتل النفس
متخصص فى حالات إنهارده وبكره وأمس
يعنى بتاع كله
وممكن ينسى مره الفوطه ومره البنج ومره مقص
وإوعى تعاقبوا ياباشا لأنو بينسى
د النسيان نعمه وإحنا عليها محافظين
ولا يمكن حد يعارض بإستثناء حزب المجانين
معلش ياباشا أنا غلطان
ممكن تسمحلى يابيه أتكلم بصراحه
بس إضمنلى الأول إن حياتى بعد كلامى تبقى مباحه
بصراحه أنا زعلان وكمان قرفان
كل المواضيع سهله إلا الإعلام
كل يومين برنامج مره حلال ومره حرام
ومره حكاوى عن الحريه فى الأديان
وكمان قنوات بتغنى ليل ونهار
والشرط المطرب يكون عريان
يعنى خلاص تقاليد الشرق
دخلت فيها سياسه الغربان
وكمان دمج الحريه مع الطغيان
إقرا شويه تاريخ الغربان
هتلاقى جناح يقتل ويدبح
والتانى يطالب بحقوق الإنسان
وإحنا يابيه بالفطرة بنتشائم م الغربان
ومش ممكن عدم وجودها زى وجودها يكون سيان
معلش ياباشا أنا غلطان
كفايه ياناس طغيان
مش قادر أتكلم وأنا هفتان
شوفو بديل للعيش إن شالله لبان
المهم الواحد يشغل بقوا لو فى الفاضى
مش شرط يكون مليان
معلش ياباشا أنا غلطان
أستحلفكم بالله وكل الأديان
لتحلوا حكايه بطن الإنسان
كفايه الناس هتفرض فى الأوطان
بصراحه ياباشا
مفيش بنا بيبنى وهو إمبارح نام جعان
معلش ياباشا أنا غلطان
.
.
. الشاعر طه الإسناوى .. من ديوان .. أنا والنساء
هايل طه بيك الاسناوى
ردحذفعليك من الله سحائب الرحمة والمغفرة والعتق من النار
ردحذفجزاك الله عنا خير الجزاء د / عبد الرحمن عبد العزيز