بتتمادي ف شرياني
ووجعاني
لكن عاشق أكون ليها
ولو عاشقه
تعيش العمر تنساني
بتجرحني
سهام الحب ف عينيها
أداديها .....وألاغيها
عشان ترضي
أكون
النني ف عينيها
أكون حنه
وتتهني بيا ف ايديها
وتبقالي وتحلالي
وتحلف يوم ما تنساني
تقول ماشي
وأتاريها مع الماشي
تروح مني
وإكمني
باادوب فيها
بأقول أصبر
لعل المولي يهديها
وترجع ليا من تاني
وتتمايل علي كتافي
وأوصافي... تناجيها
وليل الغربه.. يجمعنا
ما يخدعنا
يداوي... لينا أوجعنا
ويحييني ويحييها
وألقاها .....وتلقاني
ونستني نهار بكره
بميت فكره
يهون ...بعدها عني
ويوصل.. قربها مني
وتسكن تاني أركاني
ما أنا عاشق
خضار عينها
وتسبيلها وتكحيلها
ونور ليلها اللي خلاني
أبات أحلم بضحكتها
وطلتها
وأسمع منها لو كلمه
وتبدر خيرها علشاني
مع إني كتير أنا واثق
بإنها فانيه ...مش دايمه
ولا بتنصف..... محبيها
وياما الدنيا مات فيها
شواشي الفرح ف عيوني
وياما عشانها بت الليل
مع دموعي..... وأحزاني
**
*********************
رضا أبو الغيط
ليست هناك تعليقات:
إرسال تعليق